敢食三斤薑，毋驚鬼來碰

【文／何石松】

 

　　敢食三斤薑，毋驚鬼來碰。一方面係講一個人愛敢，有判斷力，能刻苦耐勞，擔輸贏，有膽識，有眼光，正毋會錯失像薑嫲這恁好介東西；一方面係講薑嫲對人介身體，有當大介功能。三斤薑食落去以後，可以逐走該兜妖魔鬼怪介病毒，身體自然斯會康健。因為薑嫲有健胃保肝，提神醒腦，醫病止痛，避寒保暖，預防老化，延年益壽等50零種功效。

　　難怪人講：男人不可一日無薑，女人不可一日無糖。試著冷介時節，遽遽食幾碗薑嫲茶，一定會全身當燒，歸身鬆爽，甚至會出汗，男男女女，係講敢食三斤薑，自然毋驚鬼來碰。 　　

　　所謂敢食三斤薑，當然，無一定係做一擺就食三斤薑。係講逐日就愛食薑嫲，連聖人孔子都講：「不撤薑食」，就係三餐食飯一定愛有薑嫲，係無薑嫲就無想食飯。平均年齡正30零歲定定介春秋時代，孔子斯能食到七十三歲，可能就係佢逐日食薑嫲介關係，食了薑嫲，麼介邪神魔鬼都行毋兼，就係食了三斤薑，毋驚鬼來碰。 　　

　　聽講頭擺神農氏，也安到五穀爺，佢嚐百草，識中過七十二擺介毒。有一日，佢食了山頂有毒介菇仔。突然之間，天烏地暗，頭暈腦貶，嗄橫下去，等到佢迷迷痴痴醒轉來介時節，佢鼻著一陣香氣，正知原來係薑嫲救佢介性命。因為佢出世在姜該隻位所，所以摎這種草安到姜。到春秋時代，姜正變到薑。食了薑能使佢反生，所以安到「生薑」，正經係「敢食三斤薑，毋驚鬼來碰」。 　　

　　大文學家蘇東坡，有一日去杭州西湖遶尞，看著一個八十零歲介老人家，面仔紅朵朵，皮膚白雪雪；目珠金金，腰骨竳竳；行路有風，精神當好。蘇東坡試著奇怪，仰恁老還恁會走？就問佢長壽介秘訣。老人家講：「𠊎食薑嫲食咧四十零年，所以看著毋會老啊！」同時，留下有名介養生詩句，該就係：「一斤薑嫲半斤棗，兩兩白鹽三兩草；煎也好，煮也好，合著仙藥斯像寶；逐日朝晨食一杯，青春快樂毋會老。」意思係講，若愛身體健康皮膚好，朝晨愛食薑麻嫲摎紅棗。 　　

　　正經，食薑嫲最好介時間係朝晨。有名介旅行家徐霞客，滿天下去遶山花，逍遙快樂。佢出門一定帶等薑嫲，逐日朝晨都有食薑嫲介習慣，薑嫲可以使佢當有精神，歸身牛牯無恁健，有恁好介身體，正能看盡天下好山好水好風光。所以人講：「朝晨三皮薑，生活毋使上藥坊。」 　　

　　謙虛介薑嫲，一直都當客氣在該做配料，斯愛摎佢共下，就能發揮無限介功能。比論講，頭擺大腸係無人愛介，摎薑嫲共下炒，黏皮斯變「豬腸炒薑絲」當好食介客家名菜。所以，平常愛食豬腸炒薑絲，甜蜜幸福，快樂像吟詩；愛食薑絲炒豬腸，長命百歲，地久又天長。有一擺，《紅樓夢》裡背介史湘雲請食毛蟹，冷底介人食毋得，不過無相干，薛寶釵斯講：食毛蟹最好撎薑嫲，可以避寒，所謂「性防積冷還須薑」，所以食毛蟹加上薑，可以擋佢三支槍！ 　　

　　其實，頭擺正經有人連食三斤薑，病就醫好介例仔！南北朝時代介宋明帝，喉嗹頦發一隻瘡仔，痛到食飯毋得，無一隻醫生醫得好。看來正經毋像勢，像有鬼來碰門共樣，仰結煞？當時介名醫徐文伯聽著，遽遽就送來三斤薑，摎皇帝講：「你一日愛食三到，一到食五兩，就會好。」大家都知薑嫲當辣，宋明帝食到牙研鼻皺，目汁都食出來咧，講：「你愛辣死𠊎係無？」文伯講：「冤枉啊！你吂食忒，仰知佢有效抑無效呢？」 　　

　　皇帝刻耐仔食忒該三斤介薑嫲，講也奇怪，喉嗹頦介惡東西消忒咧。哈！無想著歷史上正經有人，連食三斤薑嫲啊！正經係：「敢食三斤薑，毋驚鬼來碰。」

※此處的「介」為大眾通用的「的」，同教育部訂的「个」之意
　　
何石松 聲檔 — 敢食三斤薑，毋驚鬼來碰（海陸腔）





　

▲BACK